Ezker Abertzaleak ezinbestekoa deritzo sistema kapitalista hau erro-errotik eraldatzeari eta sistema sozial eta ekonomiko pertsonen zerbitzuan eraikitzeari. Nazio eraikuntza eta eraldaketa sozialaren estrategia honek bere neurriak eskatzen ditu.
Hego Euskal Herria estatu espainolaren eredu ekonomikoaren menpe dago. Izan ere, estatu espainolak indarrez bere eredu ekonomiko, politiko eta soziala inposatzen digu. Estatu espainoleko ekonomia beti ahula eta menpekoa izan da. Enpresarioak ez dira inoiz ekintzaileak izan, estatuaren itzalpean negozioak egiten zituzten jaunxkilak eta espekulatzaileak besterik ez dira izan. Horiek azken hamarkadan lurra, azpiegiturak eta etxebizitzarekin espekulatu dute euroaren poderioaz eta Europako fondoaz baliatuz. Burbuila puztu dute eta lehertu denean, denok ezagutzen ditugun ondorioak izan ditu: ekonomiaren gainbehera, langabeziaren igoera eta zorren pilaketa.
